Julekakene våre!

CHOCOLATE CHIP COOKIES a la Kari!

200 g smør og

2 1/2 dl brunt sukker rørast saman med

2 1/2 dl kvitt sukker

2 egg

ca. 7 dl kveitemjøl

2 ts bakepulver

2 ts vaniljesukker

1 - 2 plate hakka kokesjokolade

Trill små kuler, set på plata, steik ved 200 grader i 8 - 10 min.

........................................................................................................................................................

KVITE JULEMENN a la Kari

125 g smelta smør

5 dl melk

400 g sukker

2 ts hornsalt

1 kg kveitemjøl

Bland alt, set kaldt natta over, kjevle og stikk ut kamelar, sauer, hjerter, stjerner....

Steikast på 200 grader i 6 - 8 min (skal vere lyse).

Putt dei i frysaren, så er dei alltid ferske og gode!

...................................................................................................................................................

DADDEL-KAKE a la Henny!

2 egg og 100 g sukker rørast til eggedosis

3 ss kveitemjøl

1 pk dadlar, delast opp og rullast i kveitemjølet

100 g valneter

1 ts bakepulver

Rund kakeform 24 cm

150 grader, auk til 180 grader, ned att til 150 grader, steiketid ca. 35 - 40 min.

Kan gjerne pyntast med piska krem.

Julemøtet!

Då er vi ferdige med 09-møta. Desembermøtet blei markert med graut og litt ekstra kos, song, lotteri, "berre forsyn deg med gamle quilteblad m.m.". Sjølv om vi ikkje hadde nisse, hadde alle med seg ein pakke, og så gjekk to frå styret rundt og delte ut ein pakke til kvar. Ja, så hadde vi vis og fortel som vanleg. Skikkeleg triveleg kveld med ca. 35 frammøtte!

Liv Ingunn sin kaleidoskop-løpar.

Her har ho laga ein ekstra lekker adventsløpar (eller er det all round?) med omvendt applikasjon.

Dei som har prøvd å få tak i kroklisser siste månaden, har måtta slite. Grunn: antakeleg AnnaKa sin løpar frå Quiltemagasinet.

Her har vi ei Gingham-jente som kosar med katte sin. Artig veske i møbelstoff bl.a.

Nyfrid med adventsduken sin. Andre som har hatt trøbbel med måla på denne duken, lurte ho på.

Reidun med lang, lekker kjøkkengardin.

Edny med adventsløparen sin.

Marie hadde med mykje flott denne kvelden. Her er bargello-løparen, som ho held kurs i.

Adventskalendar?

Marie syr roseteppet til Ann, det blir alldeles nydeleg!

Detaljar frå teppet.

Studie...

Kari med kaleidoen sin.

Ny vri på Lone Star!

Svanhild sin blå bargello.

Det enkle er ofte det beste, sjå kor lekkert!

Janne held seg framleis i den lyse delen av fargeskalaen.

Ny vri på Ann si veske, her med strykemotiv.

Margrethe si nydelege brikke, her med omvendt bretteteknikk.

Annlaug si kaleido-pute.

Sonja har boltra seg med motivstoff og omvendt applikasjon!

Fleire dekkebrikker med utklipt motivstoff.

Lurer på om det er Else P. som lurer bak denne løparen?

Desse brikkene hadde vi "kurs" på tidlegare i år, her har Laila sydd grøn variant.

Framleis Laila, er det frå Quiltemagasinet?

Og her er ho ferdig med ein tredjedel av sin Butterfly Garden. Utruleg flott!

Trur dette er Kari S. sin løpar.

Reidun med adventskalendaren sin.

Anna har laga mange slike brikker og gitt til julemesse.

Desember-møtet!

Enten ein vil det eller ei, så går tida no snøggfort mot desember og jul! Vi i styret har gleda av å invitere til eit litt annleis, men veldig avslappa medlemsmøte på ungdomsskulen

første onsdagen i desember, dvs. allereie den 2.

Du må gjerne ha med deg eit handarbeid! Og har du ikkje lyst å halde fingrane i aktivitet ein kveld, så er det lov og, berre kom og ver sosial! Vis og fortel må vi ha med oss, kanskje det blir ekstra mykje kaleidoskop i julestoff denne gongen?

Men prøv å hugse å ta med deg ei innpakka julegåve til verdi maks 50 kr. Det kan vere kva som helst, noko du sjølv kunne tenkje deg å få, gjerne heimelaga for den del.

Eit slikt mønster kan du vinne!

Primula har fleire...

Vi har kjøpt inn nokre ekstra fine gevinstar til denne kvelden, 3 flotte stitchery av Bronwyn Hayes, dei er ein del av månadsteppet Gingham Girls frå Red Brolly (raude paraply). Blokkene er kjempefine ei og ei også. Bronwyn fortel i ein mail at ho bruker desse damene i forskjellige samanhengar, og at ho studerer bilete og bloggar for å få fram ansiktsuttrykk og handlag til quiltedamer, skikkeleg fornøyelege er dei!
Les gjerne meir om Bronwyn her. Visste du forresten at Gingham er namnet på eit veve bomullsstoff, gjerne rutete?

Gingham Girls eller Gloppetausene - det går vel ut på eitt?

Liv Ingunn si kurs-kake og nokre andre "godbitar"

Ei herleg kake!
6 eggekvitar

5 dl sukker
350 g hakka peanøtter
1 pk.knuste Ritzkjeks
2 ts bakepulver
2 ts vaniljesukker

Sjokoladeglasur:
100 g smør el margarin
2 plater lys el mørk kokesjokolade
6 eggeplommer
100 g melis.

Stivpisk eggekviter og sukker.
Bland hakka peanøtter,Ritzkjeks,bakepulver og vaniljesukker i marengsen. Ha deiga i ei bakepapirkledd langpanne.
Steik kaka på 180 grader på nederste rille i omnen, 20/25 minutter.
Ta kaka ut av omnen og avkjøl ho.
Smelt smør og sjokolade. Pisk eggeplommer og melis stivt og bland med avkjølt sjokolade.Fordel glasuren over den avkjølte kaka og skjær i bitar før servering.

Håpar det smakar:))

Så over til litt anna "stoff" til glede og inspirasjon...

Sjekk parkeringsskiltet til denne butikken i Tønsberg. Har du tenkt deg på årsmøte i quilteforbundet 3. helga i mars 2010, kan du gjerne stikke innom her...

Årsmøtet skal haldast på eit fantastisk senter i Vestfold, Brunstad Konferansesenter. Staden er ikkje så sentral for oss, kanskje, og tidspunktet ikkje spesielt gunstig heller, med tanke på regionstreffet, men det er no lov å drøyme! Vi får følgje med i medlemsbladet.

Trøyst for ein stoffsamlar

-stoff isolerer skåpa dei blir oppbevarte i...

-stoffkjøp hjelper til å halde i gong konjukturane...

-stoffkjøp er billegare og meir morosamt enn psykiatri...

-stoff treng ikkje oppbevarast i kjøleskap...

-stoff skal ikkje tilberedast for å nytast...

-stoff skal ikkje matast, bytast på eller mosjonerast...

-stoffkjøp er ikkje umoralsk, ulovleg eller feitande...

-stoff roar nervane og tilfredsstiller sjela...

-stoff er bra til å dekke tidlegare tome flater, t.d. strykebrettet, kjøkkenbordet eller gjesterommet...

-stoff tilfredsstiller lengten din etter venleik og inspirasjon, i alle fall fire gonger, når du kjøper det, når du tittar på det, når du syr noko av det og når du bruker den saka det blei til slutt...

-stoff er oftast billegare enn bildelar, båtutstyr, golfutstyr og fiskesaker...

-den som har mest stoff vinn...

Du får lov å kjøpe meir stoff, det har du fortent!

Dette skiltet står inne i ein butikk i USA, sjekk Lea sin blogg. Eit besøk her hadde kanskje gjort susen, eller kva? Lea er forresten japansk, og kan hjelpe til med oversetjing av vanskelege japanske quiltebøker...

Kurshelg i november!

Farsdagshelga arrangerte GLQ kurs med Hanne Schneider. Vi hadde gleda oss lenge til denne helga, og var godt budde, sidan vi hadde sydd ferdig stitcheria på førehand, og hadde hatt toalettveska til Hanne på fleire klubbkveldar. Første dagen var altså sett av til toalettveske, eit veldig kjekt prosjekt. Her er nokre av damene opplina i "baren" med ferdige og mindre ferdige produkt. Dei halvferdige veskene er styret sine, det blei litt matlaging og slikt fornoke innimellom slaga. Vi fekk forresten applaus for godt stell, og det er veldig kjekt å ta med seg. Sjå denne blide og nøgde flokken!

To damer i styret, begge opprinnelege strilar frå same bygdo...

Elles får bileta tale for seg!

Den rosa veska til venstre her har decoupage som pynt, kjempestilig!

Søndagen stod i kaleidoskopblokka sitt teikn. Hanne har funne fram til ein genial skjæreteknikk for desse trekantane. Her er kursteppet hennar, sydd i duse japanarar, og kvilta av Merete.

Ho hadde også med seg løpar og pute, kaleidoblokkene var i forskjellige storleikar.

Anna og Hanne kom i god dialog.

Kaleidoskop er ikkje for nybyrjarar akkurat! For det første må ein vere veldig nøyaktige, for det andre er det ikkje så lett for utrena auge å sjå dei ulike verknadene.

Inger var ikkje fornøgd, men Hanne svinga rundt på nokre blokker, og simsalabim...

Mange sydde i julestoff, det skal bli spanande å sjå resultata på vis og fortel på julemøtet i desember!

Dersom vi får oppskrift på snickerskaka og "kaka med gult", kjem dei på innlegg seinare.

Myklebustdalen, ei perle litt utanfor allfarveg...

Flyet til Hanne hadde god medvind og kom ti minutt før tida på fredag. Etter shopping på Arkja, der Marie jobbar til vanleg, tok vi turen heim til Marie i Myklebustdalen. Der venta ho med herleg lunch. Desse to damene kjenner kvarandre frå Dear Jane- og Nearly Insane-kurset i Førde tidlegare i haust, då dei begge kamperte hjå Åse Kjærland.

Marie er ei dyktig sydame, og har både utdanning innan faget og lang erfaring. Vi fekk sjå mykje lekkert, her er Bente Tufte-duken hennar. Nydeleg!

Men kven visste om Marie sine dugleikar når det gjeld å lage sine eigne dukker? Ikkje bloggskrivaren, i alle fall. Det viser seg at ho har gått på dukkekurs hjå Turid Eide på Sandane i ein tiårsperiode, and is still going on... Her viser ho fram dukka ho hadde på utstilling i Trondheim ved eit høve, og fekk god respons på (raud sløyfe)! Alle detaljar er med på kledefronten, frå innerst til ytterst!

Denne dukka under arbeid skal ha ekte Nordfjordbunad. Sølvet er allereie på plass. Ansiktet på denne jenta er særleg levande, og minner meg om ei jente eg kjenner.... Undertøyet er klart, og her står ho og held stoffet til "stakkjen"!

Trur Hanne blei imponert over dette!

I ein krok av stova står denne familien...

...i ein annan denne flokken av ulike typar!

Morosamt par!

Sjekk den rypa! Det er utruleg med arbeid med slike dukker. Berre det å måle ansikta må vere ei tolmodsprøve av dimensjonar.

Dei halvferdige nissane stod klare på syrommet, utolmodige etter å bli ferdig påkledde...
Tusen takk for generøsiteten, Marie, dette var litt av ei oppleving!

November-møtet!

Kari S. har vore på Janome-kurs med Patricia Iden, her er resultatet. Noko slikt er det mange av oss som både har lyst til å sy og har brukt for, ikkje minst!

Det har vore hektisk aktivitet i GLQ siste veka! Onsdag var det klubbmøte, og her er bilete frå denne kvelden. Klubb-aktiviteten og kaffimaten finn de litt om i det forige innlegget!

Først ut er "sy-boka" til Anna. Ho har vore på kurs med Patricia Iden, og her er litt av innhaldet, litt av eit arbeid, men sikkert veldig praktisk, og arbeidet er jo utsøkt!

Hugsar slett ikkje kven som stod bak denne, var det Solbjørg? Nei, det var Anne...

Inger har prøvd seg fram med lommeveske, eller var det rumpetaske? Ho får til det meste ho prøver seg på!

Reidun (nr. 1) har hatt dilla alldeles siste vekene, her er løparar i søkk og kav, nokre for jul og nokre for advent, skikkeleg lekre! Quiltemagasinet har vel hatt mønster på desse, og så har ho tilpassa dei slik ho likar dei. Godt jobba!

Dette er vel hurtighjørneteknikk, eller?

Ann-Elisabet har hatt stor produksjon, først vesker... ...så slumreteppe...

... og endå eit teppe!

Og her er sanneleg fleire vesker!

Er det Annfrid som skjuler seg bak AnnAKa sin kalender?

Denne løparen er berre så knas! Motivstoff i midten, som er kvilta rundt, Annfrid er meistaren bak dette.

Ein liten Eskil får dette krabbeteppet, laga av mormor Janne.

Svanhild har laga dei nydelegaste kuvertbrikker, som kan brukast både på

framsida og baksida.

Solveig har laga lekker og praktisk veske.

Reidun (nr. 2) har pynta på ein "kjedeleg" løpar, resultatet blei berre så flott!

Reidun (nr. 3) har laga nydeleg veske! (Bruker alle tre Reidunane å vere på møte samtidig, eller var dette eit særtilfelle?)

Hagearbeidarane blei så fine! Kven kunne ikkje ha lyst å lage desse?

Synd at dette biletet blei så utydeleg. Kari S. har sydd denne fine veska etter eit mønster ho kjøpte på Nordisk-treffet i Gøteborg. Her er lenkja til den danske butikken som har mønsteret.

Så kjem vi til avdeling Anna + store teppe! Ho syner fram dei nydelege sengeteppa ho har sydd, og er kjempefornøgd med den profesjonelle kviltinga frå Gla'lappen.

Vi beundra baksidene også. Herlege arbeid. Kor mange sengeteppe har denne dama sydd?

Annlaug er ferdig med kattekorga si, lurer på om dette er eit broderusk frå Northern Quilts? Stor og romsleg korg, med plass til masse stoff eller garn eller kva det måtte vere.

Sonja fyrer laus med rødt og kvitt og blondar, flott!

Og sjå her, dekkebrikker med utklipte julestjerner frå motivstoff, nydeleg applikert på. Eit skikkeleg godt tips!

Her er det berre å ta ein råtjangs, er det Liv Ingunn, eller? Etter nesten ei veke er det ikkje så godt å hugse. Men duken er fin, særleg no til advent.